CCLXXXIII.

1393, Januar 30. Schloss Glatz.

Derselbe urkundet über den Verkauf der in voriger No. bezeichneten Besitzungen Seitens der Frau Gela Runge allein.

Ich Steffan Poduska von konklicher gewalt heuptmann czu Glacz vnd meynis hirren, des kongis, man, dy hernoch czu geczeuge sten geschrebin, wer bekennyn offentlich mit desem kegenwortigen brieffe allen, dy en sehen, horin adir lezen, das vor vns vnd eyme gehegt ding komen ist dy erbar vrawe Gela Rongynne, gesundis leybis mit wolbedochtem mute, mit gutem rate irre frunde, vnbetwongen vnd hat vorreychit vnd vorlangit eyn hube lengutis in dem dorffe czu Mertinsdorff vnd auch den angeval czu Heynczendorff, der erbar vrawen Annen, Heynrichis Weyss weyp, mit allem rechte, mit aller hirschaft, er vnd eren elichen geerben, do methe czu tun vnd czu losen, czu vorkeuffen, vorseczin, vorwechseln vnd an eren nocz czuwenden, wi das er vnd eren geerben allir fuglichste vnd bequemlichste geseyn mag, nichtis aussgenommen. Ouch hat dy egenante vrawe Anna vormunde gekoren, den strengen ritter hern Kilian von Haugwicz, Hans Maltwicz vnd Hans von der Bele, das se dy vrawe vorwesen, vorantworten sullen vor dem rechte, wi offte das not geschiet vnd wo sich das geborit. Des habe ich angesehen er allir gunst vnd bete vnd habe dy egenante hube leen gutis czu Mertinsdorff vnd das angevelle czu Heynczendorff von konglicher gewalt vnd macht gereychit vnd gelangit der obegenanten vrawen Annen, eren elichen geerben vnd nesten mit allem rechte, mit allir hirschaft, domethe czu tuen vnd czu losen vnd wie das vorgeschrebin stet, nichtis aussgenommen. Des czu urkunde vnd czu sicherheyt habe ich meyn ingesegil mit meynis hern des kongis man ingesegil an desin brieff losen hangen, dy auss gehegter bank czu geczeuge seynt gekoren, dy her noch geschrebin sten: Nikel von Panewicz, Thamme Czerwicz. Gegebin czu Glacz off dem hause am neesten dornstage vor vnsir vrawen tag Lichtweye noch Cristis gebort dreyczenhundert iar dornoch in den dritten vnd newnczegisten iare.

Or. Perg. Von den drei Siegeln ist nur noch das beschädigte Pannewitz'sche S. vorhanden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.